times at which various lines were completed translating
[a] 2025-12-02
[b] 2025-12-05

[ ]    ibam forte Via Sacra, sicut meus est mos,
[ ]    nescio quid meditans nugarum, totus in illis:
[ ]    accurrit quidam notus mihi nomine tantum
[ ]    arreptaque manu 'quid agis, dulcissime rerum?'
[ ]    'suaviter, ut nunc est,' inquam 'et cupio omnia quae vis.'
[ ]    cum adsectaretur, 'numquid vis?' occupo. at ille
[ ]    'noris nos' inquit; 'docti sumus.' hic ego 'pluris
[ ]    hoc' inquam 'mihi eris.' misere discedere quaerens
[a]    ire modo ocius, interdum consistere, in aurem
[a] 10 dicere nescio quid puero, cum sudor ad imos
[a]    manaret talos. 'o te, Bolane, cerebri
[a]    felicem' aiebam tacitus, cum quidlibet ille
[a]    garriret, vicos, urbem laudaret. ut illi
[a]    nil respondebam, 'misere cupis' inquit 'abire:
[a]    iamdudum video; sed nil agis: usque tenebo;
[a]    persequar hinc quo nunc iter est tibi.' 'nil opus est te
[a]    circumagi: quendam volo visere non tibi notum;
[a]    trans Tiberim longe cubat is prope Caesaris hortos.'
[a]    'nil habeo quod agam et non sum piger: usque sequar te.'
[a] 20 demitto auriculas, ut iniquae mentis asellus,
[a]    cum gravius dorso subiit onus. incipit ille:
[a]    'si bene me novi, non Viscum pluris amicum,
[a]    non Varium facies; nam quis me scribere pluris
[a]    aut citius possit versus? quis membra movere
[a]    mollius? invideat quod et Hermogenes, ego canto.'
[a]    interpellandi locus hic erat 'est tibi mater,
[a]    cognati, quis te salvo est opus?' 'haud mihi quisquam.
[a]    omnis conposui.' 'felices. nunc ego resto.
[a]    confice; namque instat fatum mihi triste, Sabella
[a] 30 quod puero cecinit divina mota anus urna:
[a]    "hunc neque dira venena nec hosticus auferet ensis
[a]    nec laterum dolor aut tussis nec tarda podagra:
[a]    garrulus hunc quando consumet cumque: loquaces,
[a]    si sapiat, vitet, simul atque adoleverit aetas."'
[a]    ventum erat ad Vestae, quarta iam parte diei
[a]    praeterita, et casu tum respondere vadato
[a]    debebat, quod ni fecisset, perdere litem.
[b]    'si me amas,' inquit 'paulum hic ades.' 'inteream, si
[b]    aut valeo stare aut novi civilia iura;
[b] 40 et propero quo scis.' 'dubius sum, quid faciam', inquit,
[b]    'tene relinquam an rem.' 'me, sodes.' 'non faciam' ille,
[b]    et praecedere coepit; ego, ut contendere durum
[b]    cum victore, sequor. 'Maecenas quomodo tecum?'
[b]    hinc repetit. 'paucorum hominum et mentis bene sanae.
[b]    nemo dexterius fortuna est usus. haberes
[b]    magnum adiutorem, posset qui ferre secundas,
[b]    hunc hominem velles si tradere: dispeream, ni
[b]    summosses omnis.' 'non isto vivimus illic,
[b]    quo tu rere, modo; domus hac nec purior ulla est
[b] 50 nec magis his aliena malis; nil mi officit,' inquam,
[b]    'ditior hic aut est quia doctior; est locus uni
[b]    cuique suus.' 'magnum narras, vix credibile.' 'atqui
[b]    sic habet.' 'accendis quare cupiam magis illi
[b]    proximus esse.' 'velis tantummodo: quae tua virtus,
[b]    expugnabis: et est qui vinci possit eoque
[b]    difficilis aditus primos habet.' 'haud mihi deero:
[b]    muneribus servos corrumpam; non, hodie si
[b]    exclusus fuero, desistam; tempora quaeram,
[b]    occurram in triviis, deducam. nil sine magno
[b] 60 vita labore dedit mortalibus.'