232 to 248 ← 249 to 267 → 268 to 277
249 Nonne vides quanto celebretur sportula fumo?
250 centum convivae, sequitur sua quemque culina.
251 Corbulo vix ferret tot vasa ingentia, tot res
252 inpositas capiti, quas recto vertice portat
253 servulus infelix et cursu ventilat ignem.
254 scinduntur tunicae sartae modo, longa coruscat
255 serraco veniente abies, atque altera pinum
256 plaustra vehunt; nutant alte populoque minantur.
257 nam si procubuit qui saxa Ligustica portat
258 axis et eversum fudit super agmina montem,
259 quid superest de corporibus? quis membra, quis ossa
260 invenit? obtritum volgi perit omne cadaver
261 more animae. domus interea secura patellas
262 iam lavat et bucca foculum excitat et sonat unctis
263 striglibus et pleno componit lintea guto.
264 haec inter pueros varie properantur, at ille
265 iam sedet in ripa taetrumque novicius horret
266 porthmea nec sperat caenosi gurgitis alnum
267 infelix nec habet quem porrigat ore trientem.