268 to 277 ← 278 to 301 → 302 to 314
278 Ebrius ac petulans, qui nullum forte cecidit,
279 dat poenas, noctem patitur lugentis amicum
280 Pelidae, cubat in faciem, mox deinde supinus:
281 [ergo non aliter poterit dormire; quibusdam]
282 somnum rixa facit. sed quamvis inprobus annis
283 atque mero fervens cavet hunc quem coccina laena
284 vitari iubet et comitum longissimus ordo,
285 multum praeterea flammarum et aenea lampas.
286 me, quem luna solet deducere vel breve lumen
287 candelae, cuius dispenso et tempero filum,
288 contemnit. miserae cognosce prohoemia rixae,
289 si rixa est, ubi tu pulsas, ego vapulo tantum.
290 stat contra starique iubet. parere necesse est;
291 nam quid agas, cum te furiosus cogat et idem
292 fortior? "unde venis" exclamat, "cuius aceto,
293 cuius conche tumes? quis tecum sectile porrum
294 sutor et elixi verecis labra comedit?
295 nil mihi respondes? aut dic aut accipe calcem.
296 ede ubi consistas: in qua te quaero proseucha?"
297 dicere si temptes aliquid tacitusve recedas,
298 tantumdem est: feriunt pariter, vadimonia deinde
299 irati faciunt. libertas pauperis haec est:
300 pulsatus rogat et pugnis concisus adorat
301 ut liceat paucis cum dentibus inde reverti.